ജ്വലിക്കുന്ന മനസ്സുകൾ - എപിജെ അബ്ദുൽ കലാം

ജ്വലിക്കുന്ന മനസ്സുകൾ 

എപിജെ അബ്ദുൽ കലാം 

വിവർത്തനം: എം പി സദാശിവൻ 

വായന: മുസ്തഫ മണ്ണാർക്കാട്

കലാമിൻറെ Ignited Minds ആണ് മൂല കൃതി. ഭാരതത്തിൻറെ ശത്രു, ദാരിദ്ര്യം ആണ് എന്ന് കണ്ടെത്തുകയാണ് കലാം. ദാരിദ്ര്യത്തിന് എതിരെ പോരാടാൻ യുവമനസ്സുകളെ പ്രചോദിപ്പിക്കുന്നു ഈ പുസ്തകത്തിലൂടെ കലാം. പതിനൊന്നോളം അധ്യായങ്ങളിലായി ക്രമീകരിച്ചതാണ് ഗ്രന്ഥം. 'ഒരു സ്വപ്നവും അതിൻറെ സന്ദേശവു'മാണ് ഒന്നാമധ്യായം. 'അഭിവൃദ്ധിയിലേക്ക് മുന്നേറാൻ നമുക്ക് അനുകരണീയമായ ഒരു മാതൃക വേണ'മെന്ന് രണ്ടാം അധ്യായം പറയുന്നു. മൂന്നാം അധ്യായത്തിൽ 'മഹാമനീഷികളായ ഗുരുക്കന്മാരും ശാസ്ത്രജ്ഞരു'മാണ് ചർച്ചാവിഷയം. കലാം കാണുകയും പരിചയിക്കുകയും ചെയ്ത സന്യാസിമാരിൽ നിന്നും സിദ്ധന്മാരിൽ നിന്നും പഠിച്ച പാഠം ആണ് നാലാം അധ്യായം.

'ഒരു ദശാബ്ദം മുമ്പ് പരമാചാര്യ യുടെ കാലത്ത് നടന്ന ഒരു സംഭവം മുൻ രാഷ്ട്രപതി ആർ വെങ്കട്ടരാമൻ പറഞ്ഞത് ഞാൻ ഓർമിച്ചു. കാഞ്ചി മഠത്തോട്  ചേർന്ന് സ്ഥിതി ചെയ്തിരുന്ന മൂന്നൂറു വർഷം പഴക്കമുള്ള മോസ്ക് വെങ്കട്ടരാമൻ എനിക്ക് കാട്ടിത്തന്നു . ചരിത്രപ്രസിദ്ധമായ മോസ്ക് സന്ദർശിക്കാൻ ധാരാളം ആളുകൾ വരാറുണ്ട്. മഠത്തിലും സന്ദർശകരുടെ ബാഹുല്യം ആണ് . ഗതാഗത തിരക്ക് അനിയന്ത്രിതം ആയപ്പോൾ mosque സൗകര്യപ്രദമായ മറ്റൊരിടത്തേക്ക് മാറ്റി സ്ഥാപിക്കാൻ ജമാഅത്തും ജില്ലാ ഭരണാധികാരികളും തീരുമാനിച്ചു. മോസ്ക് പുനർ നിർമ്മാണ ചുമതല മഠത്തിന് ആയിരിക്കും. ഈ തീരുമാനം എങ്ങനെയോ പരമാചാര്യരുടെ കാതുകളിൽ എത്തി. ആ തീരുമാനത്തെ അദ്ദേഹം ശക്തമായി എതിർത്തു. അദ്ദേഹം പറഞ്ഞു: 'വാസ്തവത്തിൽ വെളുപ്പിന് നാലരക്കുള്ള ബാങ്കുവിളി കേൾക്കുമ്പോഴാണ് ഞാനുണർന്ന് എൻറെ കർത്തവ്യങ്ങളിൽ മുഴുകാറുള്ളത്.' യാതൊരു കാരണവശാലും മോസ്ക് മാറ്റി പണിയേണ്ടതില്ലെന്ന് അദ്ദേഹം ജില്ലാ ഭരണാധികാരികളെയും മഠത്തെയും ബോധ്യപ്പെടുത്തി. അദ്ദേഹം മൗനവ്രതം ആരംഭിക്കുകയും ചെയ്തു (p58).

മതസൗഹാർദ്ദം വേണ്ടുവോളം ഉണ്ടായിട്ടും നാം എന്തുകൊണ്ട് ഇങ്ങനെ? കലാമിൻറെ കണ്ടെത്തൽ: ഇത്രയും മഹത്തായ ഒരു രാഷ്ട്രവും ഇത്രയും മഹത്തായ ഒരു ജനതയും എന്തുകൊണ്ടാണ് വർഗീയ കലാപങ്ങൾക്ക് ഇരയാകുന്നത്? രാഷ്ട്രത്തിന്  ഒരു ലക്ഷ്യമില്ലാതെ വരുമ്പോൾ സങ്കുചിത ചിന്താഗതിക്കാർ രംഗം കയ്യടക്കും എന്നാണ് എനിക്ക് തോന്നുന്നത്. 'ശാസ്ത്രത്തിന്റെയും സാങ്കേതികവിദ്യയുടെയും നേട്ടങ്ങൾ മനുഷ്യരാശിയിൽ എത്തിക്കാൻ ശാസ്ത്രവും ആത്മീയതയും തമ്മിൽ സംയോജിപ്പിക്കേണ്ടത് അത്യാവശ്യമാണ്.'(p 61).

'നാലുഭാഗത്ത് നിന്നും മഹത്തായ ചിന്തകൾ നമ്മളിലേക്ക് കടന്നു വരട്ടെ എന്ന ഋഗ്വേദ സൂക്തം നമുക്ക് സ്മരിക്കാം' (p 62).

' 1947 ഓഗസ്റ്റ് 15ന് അർദ്ധരാത്രി പ്രധാനമന്ത്രി പണ്ഡിറ്റ് ജവഹർലാൽ നെഹ്റു നടത്തിയ  സ്വാതന്ത്ര്യദിന പ്രസംഗം കേൾക്കാൻ എൻറെ ഹൈസ്കൂൾ അധ്യാപകനായിരുന്ന റവ: അയ്യാ ദുരൈ സോളമൻ എന്നെ കൂട്ടിക്കൊണ്ടുപോയി. ഞങ്ങൾ സ്വതന്ത്രരായി എന്ന അദ്ദേഹത്തിൻറെ പ്രസംഗം ഞങ്ങളെയെല്ലാം ആവേശഭരിതരാക്കി. ആ മഹാ സംഭവം പിറ്റേ ദിവസത്തെ പത്രങ്ങളിൽ വന്ന തലക്കെട്ടുകൾ പിടിച്ചുപറ്റിയിരുന്നു. പക്ഷേ ഞാൻ വായിച്ച തമിഴ് പത്രത്തിൽ നെഹ്റുവിൻറെ പ്രസംഗത്തോട് ഒപ്പം മറ്റൊരു വാർത്ത കൂടി ഉണ്ടായിരുന്നത് എൻറെ മനസ്സിൽ മായാതെ കിടപ്പുണ്ട്. നവഖാലിയിൽ ആക്രമണത്തിനിരയായ കുടുംബങ്ങൾക്ക് ആശ്വാസം പകരാൻ മഹാത്മാഗാന്ധി നഗ്നപാദനായി നടന്ന വാർത്തയായിരുന്നു അത്. സാധാരണഗതിയിൽ ചുവപ്പ് കോട്ടയുടെ പരിസരത്ത് ആദ്യമായി ദേശീയ പതാക ഉയർത്തേണ്ട വ്യക്തിയായിരുന്നു ഗാന്ധിജി . പക്ഷേ അദ്ദേഹം നവഖാലിയിലേക്കാണ് പോയത്.  അതാണ് അദ്ദേഹത്തിൻറെ മഹത്വം (പേജ് 63).

അഞ്ചാം അധ്യായം രാഷ്ട്രീയത്തിനും മതത്തിനും ഉപരിയായ രാജ്യസ്നേഹം ആണ് പറയുന്നത് ഇന്നത്തെ ഇന്ത്യയെ കുറിച്ച് എഴുതുന്നു: 'നമ്മുടെ രാജ്യത്തിൻറെ അതിരുകൾക്കപ്പുറം  എത്തുന്ന ദർശനവും ആശയവും  ആർജ്ജവവുമുള്ള നേതാക്കന്മാരുടെ തലമുറ അവസാനിച്ചതിൽ നമുക്ക് ദുഖിക്കാം. ഏതെങ്കിലും ഒരു പ്രത്യേക രാജ്യവുമായി ഭ്രാന്തമായ ആഭിമുഖ്യം വെച്ചുപുലർത്തുകയും സമീപകാലം വരെ നാം നേതൃത്വം നൽകിയിരുന്ന മൂന്നാം ലോകം ഉൾപ്പെടെയുള്ള ലോകത്തിലെ ഇതര ഭാഗങ്ങളെല്ലാം വിസ്മരിക്കുകയും ചെയ്യുന്ന വിചിത്ര മായ ഗവൺമെൻറ് നടപടി ഓർത്ത് നമുക്ക് വിലപിക്കാം. അന്താരാഷ്ട്രതലത്തിൽ നാം എത്തിച്ചേർന്നിട്ടുള്ള ദയനീയമായ അവസ്ഥയിൽ നമുക്ക് പരിഹരിക്കാം പരിതപിക്കാം.' (പേജ് 68).

  'അമേരിക്കൻ മണ്ണിൽ 10000 ന്യൂക്ലിയർ ആയുധങ്ങളും റഷ്യയിൽ മറ്റൊരു 10000 ന്യൂക്ലിയർ ആയുധങ്ങളും ശേഖരിച്ചു വച്ചിട്ടുണ്ട്. ഇംഗ്ലണ്ട് ചൈന ഫ്രാൻസ് പാക്കിസ്ഥാൻ തുടങ്ങിയ രാജ്യങ്ങൾക്കും ധാരാളം ആണവായുധ ശേഖരം ഉണ്ട്. START II, സമീപകാലത്ത് അമേരിക്കയും റഷ്യയും തമ്മിൽ ഉണ്ടാക്കിയ കരാറുകളിലും ഓരോരുത്തരുടെയും പക്കലുള്ള ആയുധങ്ങളുടെ എണ്ണം 2000 ആക്കി കുറക്കണം എന്ന് മാത്രമേ പറയുന്നുള്ളൂ. ഈ കരാറുകൾക്കും അവസാനരൂപം ആയിട്ടില്ല' ( പേജ് 68)

ഭാവി ഇന്ത്യയെക്കുറിച്ചുള്ള കലാമിൻറെ സ്വപ്നം ഇങ്ങനെയാണ് വിവരിക്കുന്നത്: 'വികസിതമായ ഇന്ത്യ നഗരങ്ങളുടെതായ ഒരു രാഷ്ട്രം ആയിരിക്കുകയില്ല. ടെലിമെഡിസിനും ടെലി വിദ്യാഭ്യാസവും ഇ-കമ്മേഴ്സും ഉള്ള പരിഷ്കൃതമായ ഗ്രാമങ്ങളുടെ ഒരു ശൃംഖല ആയിരിക്കും അത്. ബയോടെക്നോളജിയുടെയും ബയോസയൻസ്കളുടെയും കാർഷിക ശാസ്ത്രത്തിന്റെയും വ്യവസായ വികസനത്തിന്റെയും സംയോഗത്തിൽ നിന്നാണ് പുതിയ ഇന്ത്യ രൂപംകൊള്ളുന്നത്. വ്യക്തിതാൽപര്യങ്ങളെക്കാളും രാഷ്ട്രീയ കക്ഷികളെക്കാളും വലുതാണ് രാഷ്ട്രമെന്ന ബോധത്തോടെ രാഷ്ട്രീയ നേതാക്കൾ പ്രവർത്തിക്കും. ഈ മനോഭാവം നഗരങ്ങളും ഗ്രാമങ്ങളും തമ്മിലുള്ള അന്തരം കുറയ്ക്കും. നാട്ടിൻപുറം പുരോഗതി പ്രാപിക്കുമ്പോൾ ഗ്രാമങ്ങളിലെ പ്രകൃതി നൽകുന്ന മികച്ച ഉൽപന്നങ്ങളുടെയും സമ്പത്തിന്റെയും പങ്കുപറ്റാൻ നഗരവാസികൾ അവിടേക്ക് ചേക്കേറും' (പേജ് 72) തികച്ചും പരിമിതമായ ഒരു ബജറ്റിൽ കേവലം 36 കോടി രൂപ ചെലവിലാണ് 1989 'അഗ്നി' വിജയകരമായി പരീക്ഷിച്ചത്. (പേജ് 99). ബ്രിട്ടീഷ് ഭരണാധികാരികൾ അനുകൂലമല്ലാതെ ഇരുന്നിട്ടും ജംഷഡ്ജി ടാറ്റ ഇന്ത്യയിൽ ഉരുക്കു വ്യവസായം തുടങ്ങി. ആചാര്യ  പി സി റായ് കെമിക്കൽ ഫാർമസ്യൂട്ടിക്കൽ വ്യവസായം പടുത്തുയർത്തി.  J.N Tata  നിർമ്മിച്ച ബാംഗ്ലൂരിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ്, പണ്ഡിറ്റ് മദൻ മോഹൻ മാളവ്യ സ്ഥാപിച്ച BHU, സർ സയ്യിദ് അഹമ്മദ് ഖാൻ സ്ഥാപിച്ച AMU എന്നിങ്ങനെ  പല മഹാ പ്രസ്ഥാനങ്ങളുടെയും ഉദയം നാം കണ്ടു (പേജ് 104).

യുവ മനസ്സുകളെ ഉത്തേജിപ്പിക്കുന്ന മഹത്തായ ഒരു രചനയാണ് 'ജ്വലിക്കുന മനസ്സുകൾ '.